2016 in Bild und Ton


Johresbricht 2016, erschte Däil

Das Johr isch prägt gsi vom Äidgenössische Musigfescht in Montreux. Nach 30 Johr het dr Veräin wieder emol amene settige Alass täilgnoh und sich musikalisch guet präsentiert. Mitmache isch wichtig gsi, e guets Ziil ha, Kameradschaft chönne erläbe und Lüt vo andere Veräin träffe loose. Mir häi au an verschiedene Schtändeli und am Bezirksmusigdag öis vo dr beschte Siite chönne zäige. Mir dörfe s'16ni sicher als en erfolgriichs Johr in Erinnerig bhalte.

 

Was häi mir so alles erläbt ?

 

Fr, 8.1.16, Nöijohrsbummel

 

S'isch e rägnerische Obe, wo mir öis bim Probelokal in Päntlion besammle. Gmüetlich schpaziere mir uf Nugle übere. Bi dr MZH unterem Dächli gits e Rascht mit feinem Punsch und eme super guete Schpäck-Zopf. Wär will, cha dr Punsch no würze mit eme richtig heftige Strohrum.

 

Und bald gohts witer, mir si sehr überrascht, wo mir bim Christian, öisem Kassier an dr Lieschtler-Strooss iiglade si, im Partyruum Platz z'neh. S'isch alles vorberäitet für e wunderbare Raclette-Obe. Mir gniesse das sehr, chömme mehr als gnueg über und dörfe das feine Ässe mitere Glace-Torte abschliesse.Dr Rückmarsch uf Päntlion isch scho weniger nass und duet nach däm Raclette öisne Büch sehr guet. Danke Christian, dass mir bi Dir und dr Familie häi dörfe z'Gascht sii.

 

Fr, 15.1.16, erschti Prob

 

Hüt findet die erschti Prob schtatt vo däm Johr.

 

Fr, 22.1.16, Johresversammlig

 

Am siebeni zobe gits Znachtässe no vor dr Johresversammlig. Denn häi mir öisi zwöiehalbschtündigi Sitzig und dörfe d'Gschäft vom Veräin erledige. S'fröit is sehr, dass mir das Johr uf Fraue-Power chönne zellä. Mir düe d'Daniela ufneh und mir dörfe die erschti Veteranin vo öisem Verein, s'Kathrin ehrä für 25 Johr Musigmache. Bravo, mir si mit Dir zäme schtolz uf das Eräignis.

 

Mir erfahre, dass drei Nochwuchs-Schpieler fescht am Üebe si, d'Svenja und d'Lena vo Päntlion, dr Andrin vo Nugle, ihne wünsche mir vill Durchhaltewille und Fröid an däm Hobby.

 

Sa, 5.3.16, Empfang UHC

D'Unihockeyaner chömme hüt zobe häi vom Cup, wo in Bärn g'schpiilt worden isch. Mir erwarte sä uf die Halbi föifi, was nid klappt. Mir chehre denn im Räbschtock ii, warte denn wieder, denn aber ändlich sötte si choo, mir warte wieder uf die föifi, denn wills no rägne, mir warte ziimlich lang bim Mäni vorusse und halb underem Dach. Schlussändlich, wo alli Hockeyaner früsch duscht und parat si, chönne mir die chliini Marschmuusig mache, füehren alli in d'MZH und ändlich cha dä Empfang schtattfinde. Au wenn s'nid ganz für e Siig an däm Schwizer Cup g'längt het; d'Hockeyaner si z'friide und fröie sich über en Ufmarsch und musikalisch Empfang.